Fake Olympiads : అసలు ఒలింపియాడ్స్‌ ప్రక్కకి...చలామణిలో నకిలీ ఒలింపియాడ్స్‌ !

• శ్రీచైతన్య, నారాయణ సంస్థల కక్కుర్తి !
• అత్యధిక స్టూడెంట్స్‌ ఉన్న సంస్థలు కావటంతో ఇష్టారాజ్యం
• సొంత స్టూడెంట్స్‌తోనే నకిలీ ఒలింపియాడ్స్‌ దందా !

మీ ఇంట్లో పిల్లలున్నారా ? వారు శ్రీచైతన్య, నారాయణ వంటి కార్పొరేట్‌ స్కూల్స్‌లో చదువుతున్నారా ? మీ పిల్లలు ఒలింపియాడ్‌ ఎగ్జామ్స్‌ కోసం పదే పదే ఫీజలు అడుగుతున్నారా ? మీరు కట్టే స్కూల్‌ ఫీజులతో పాటు ఒలింపియాడ్స్‌ ఎగ్జామ్స్‌ పేరుతో అదనపు ఆర్థిక భారాన్ని మోస్తున్నారా ? అయితే ఈ విషయం మీకోసమే. శ్రద్ధగా చదవండి. ఒక్కసారి గమనించండి. అసలు మీ పిల్లలు వ్రాసే ఒలింపియాడ్స్‌  స్టేట్‌ లెవలా ? నేషనల్‌ లెవలా ? ఇంటర్‌నేషనల్‌ లెవలా ? ఏ సంస్థ నిర్వహిస్తోంది ? ఆ ఎగ్జామ్స్‌కి ఉన్న విశ్వసనీయత ఎంత ? అని ఎప్పుడైనా ఆలోచించారా ? కనీసం మీ స్కూల్‌ యాజమాన్యాన్ని ప్రశ్నించారా ? అయితే మీరు కచ్చితంగా మోసపోతున్నారు. కావాలంటే ఒక్కసారి పరిశీలించండి. దేశవ్యాప్తంగా ఎన్నో ప్రభుత్వ అనుబంధ, ప్రైవేటు మరియు కొన్ని సేవాసంస్థలు విద్యార్థుల్లో స్కిల్స్‌ను మెరుగుపరచడానికి, ప్రతిభావంతులుగా మలచడానికి ఆయా రంగాల్లో అవకాశాలు కల్పించడానికి, విద్యార్థుల్లో విజయంసాధనపై ఆత్మవిశ్వాసం కల్గించడానికి ఒలింపియాడ్‌ ఎగ్జామ్స్‌ను నిర్వహిస్తున్నారు. వాటిల్లో చాలా వరకు దశాబ్దాల అనుభవం ఉన్న సంస్థలు ఉన్నాయి. ఎగ్జామ్స్‌ను ఎంతో ప్రతిష్టాత్మకంగా నిర్వహిస్తున్నాయి. ఆ సంస్థ సర్టిఫికేట్‌ అందుకుంటే ఒక గుర్తింపు, ఒక గౌరవం లభిస్తాయి. అలాంటి సంస్థల్ని తోసిరాజని ఇప్పుడు శ్రీచైతన్య, నారాయణ వంటి సంస్థలు ఆయా ప్రతిష్టాత్మక సంస్థల ఒలింపియాడ్స్‌ను పోలిఉండేలా నకిలీ ఒలింపియాడ్స్‌ను నిర్వహిస్తూ డబ్బులు దండుకునే వ్యారారధోరణికి తెరతీశాయి. దేశవ్యాప్తంగా ప్రఖ్యాత సంస్థలు నిర్వహించే ఒలింపియాడ్స్‌ను ప్రక్కకు పెట్టి శ్రీచైతన్య, నారాయణ సంస్థలు తమ సొంత ఒలింపియాడ్స్‌ నిర్వహణకు తెరతీశాయి. దేశవ్యాప్తంగా ఉన్న శ్రీచైతన్య, నారాయణ స్కూల్స్‌లో అత్యధిక సంఖ్యలో ( శ్రీచైతన్య 6 లక్షల మంది, నారాయణలో 4 లక్షలకుపైగా) విద్యార్థులు చదువుతున్న స్కూల్స్‌ కావటం చేత వేరే ఒలింపియాడ్స్‌కి డబ్బులు చెల్లించటం ఇష్టలేక సొంతంగా ఒలింపియాడ్స్‌ నిర్వహణకు తెరతీశాయి. శ్రీచైతన్య, నారాయణ సంస్థలే సొంతంగా ఒక బినామీని ఏర్పాటు చేసుకుని వారి పేరు మీద సొసైటీ ఏర్పాటు చేసి ఆయా ఒలింపియాడ్‌ ఎగ్జామ్స్‌ను నిర్వహిస్తున్నట్లు పైకి కలరింగ్‌ ఇస్తూ ఇష్టారాజ్యంగా దోపిడీకి తెగబడుతున్నాయి. ఈ దెబ్బతో దేశంలోని ప్రముఖ ఒలింపియాడ్స్‌ అన్నీ విద్యార్థులు లేక వెలవెలబోతున్నాయి. దీంతో ఆయా స్వచ్ఛంద, ప్రైవేటు సంస్థలు సోషల్‌ మీడియా వేదికగా ప్రకటనలు ఇచ్చుకుంటున్నాయి. దాదాపు 10 లక్షల మంది విద్యార్థులు వ్రాయటం లేకపోవటంలో ప్రఖ్యాత, ప్రతిష్టాత్మక ఒలింపియాడ్‌ సంస్థలు ఓ సర్వేను నిర్వహించాయి. దాదాపు పెద్దపెద్ద సంస్థలన్నీ ఆయా స్కూల్స్‌, కాలేజీల్లో చదివే విద్యార్థులను వారు నిర్వహించే ఎగ్జామ్స్‌ వ్రాసే విధంగా కట్టడి చేస్తున్నాయని తేలింది. ఇలాంటి సొంత ఒలింపియాడ్స్‌ వలన విద్యార్థులకు ఎలాంటి గుర్తింపు లేకపోగా, పరీక్షల్లో అంత స్టాండర్డ్స్‌ లేవని తేలింది.

ఒలింపియాడ్స్‌ విద్యార్థులపై అదనపు ఒత్తిడే !

మంత్లీ ఎగ్జామ్స్‌, క్వాటర్లీ ఎగ్జామ్స్‌, ఆఫ్‌ఇయర్లీ ఎగ్జామ్స్‌, ప్రాక్టీస్‌ ఎగ్జామ్స్‌, ఫైనల్‌ ఎగ్జామ్స్‌ ఇలా విద్యార్థికీ ప్రతి రోజూ ఒక పరీక్షే. పోటీ ప్రపంచం పేరుతో పరీక్షల మీద పరీక్షలు నిర్వహిస్తూ విద్యార్థుల బాల్యాన్ని చిదిమేస్తూ, మరోవైపు చదువు పేరుతో మెదడుపై ఒత్తిడిని పెంచుతూనే ఉన్నాయి కార్పొరేట్‌ సంస్థలు. ఇవి సరిపోవన్నట్లు కార్పొరేట్‌ సంస్థలు ఏ పరీక్షలు చెబితే అవి గుడ్డిగా నమ్మి ఎగ్జామ్స్‌ పేరుతో మీ పిల్లలను తీవ్రఒత్తిడికి గురి చేస్తూ, మరో వైపు సొమ్మును కోల్పోతున్నారు. ఇప్పటికైనా మేల్కోకుంటే రాబోయే తరాలు ఒత్తిడితో పాటు మానసిక అనారోగ్యంతో బాధపడే ప్రమాదం ఉందని నిపుణులు అభిప్రాయపడుతున్నారు. విద్యార్థులపై అంత ప్రేమ, వారి భవిష్యత్తుకు బంగారు బాటలు వేస్తున్నామని చెప్పే శ్రీచైతన్య, నారాయణ సంస్థలు వారి స్టూడెంట్స్‌కి ఉచితంగా ఇలాంటి ఒలింపియాడ్స్‌ నిర్వహించవచ్చు కదా అనే అభిప్రాయం తల్లిదండ్రుల నుండి వ్యక్తం అవుతోంది. 

శ్రీచైతన్య నిర్వహించే నకిలీ ఒలింపియాడ్స్‌ ఇవే. (INTSO EDUCATION AND KAT (KNOWLEDGE ASSESSMENT TEST)

ఒలింపియాడ్స్‌ పేరును వాడుకుంటూ శ్రీచైతన్యయే INTSO EDUCATION పేరుతో ఓ బినామీ సంస్థలను నెలకొల్పి ఒలింపియాడ్స్‌ నిర్వహిస్తోంది. దేశవ్యాప్తంగా ఎంతో పేరుప్రఖ్యాతులు ఉన్న ఒలింపియాడ్‌ ఎగ్జామ్స్‌కు ఉన్న క్రేజ్‌ను క్యాష్‌ చేసుకునేందుకు మ్యాథ్స్‌ టాలెంట్‌ సెర్చ్‌ ఒలింపియాడ్‌ (MSTO), ఆప్టిట్యూడ్‌ టాలెంట్‌ సెర్చ్‌ ఒలింపియాడ్‌ (ASTO) , ఇంగ్లీష్‌ టాలెంట్‌ సెర్చ్‌ ఒలింపియాడ్‌ (ESTO) , సైన్స్‌ టాలెంట్‌ సెర్చ్‌ ఒలింపియాడ్‌ (STSO)  , జి.కె. టాలెంట్‌ సెర్చ్‌ ఒలింపియాడ్‌ (GTSO) పేరుతో అచ్చంగా ఒలింపియాడ్స్‌ను పోలిన విధంగా పేర్లు పెట్టి మొత్తం 5 రకాల ఒలింపియాడ్స్‌ను నిర్వహిస్తోంది శ్రీచైతన్య.  ఈ ఒలింపియాడ్‌ పరీక్షల కోసం అన్నీ శ్రీచైతన్య స్కూల్స్‌లో ఉన్న విద్యార్థులందరిపై అదనపు భారం మోపుతోంది. 5 రకాల ఒలింపియాడ్స్‌ కోసం ఒక్కో పరీక్షకు రూ. 150/- చొప్పున 5 పరీక్షలకు గాను రూ. 750/- వసూలు చేస్తోంది శ్రీచైతన్య. 2022-23 విద్యాసంవత్సరానికి 4 లక్షల మంది విద్యార్థుల దగ్గర నుండి రూ. 750/- చొప్పున రూ.30 కోట్లు వసూలు చేసింది. గత 10 సంవత్సరాలుగా ఈ దోపిడీని నిరంతరాయంగా కొనసాగిస్తోంది. విచిత్రం ఏమిటంటే  దేశవ్యాప్తంగా శ్రీచైతన్య స్కూల్స్‌లో చదివే విద్యార్థులు, శ్రీచైతన్య మేనేజ్‌మెంట్‌ అనుబంధంగా నడిచే ప్రైవేట్‌ స్కూల్స్‌లో చదివే విద్యార్థులు మాత్రమే ఈ పరీక్షల్లో పాల్గొంటారు. వేరే ప్రైవేట్‌ స్కూల్‌ విద్యార్థులు ఇందులో పాల్గొనక పోవటం గమనార్హం. కొన్ని గవర్నమెంట్‌ స్కూల్స్‌, మరికొన్ని చిన్న చిన్న ప్రైవేట్‌ స్కూల్స్‌ నిర్వాహకులకు డబ్బు ఆశ చూపి పెద్దఎత్తున రిజిస్ట్రేషన్‌ చేసుకునేలా ఒప్పందాలు చేసుకున్నట్లు ఆరోపణలు ఉన్నాయి. 

KNOWLEDGE ASSESSMENT TEST (KAT) : క్యాట్‌ అకాడమీ పేరుతో దేశవ్యాప్తంగా పోటీపరీక్షలు నిర్వహిస్తున్న నాలెడ్జ్‌ ఆప్టిట్యూట్‌ టెస్ట్‌ సంస్థను కాపీ చేస్తూ KNOWLEDGE ASSESSMENT TEST పేరుతో విద్యార్థులను దోచుకునేందుకు క్యాట్‌ ఒలింపియాడ్‌ పేరుతో దోపిడీకి తెరతీసింది. దీనిలో 3 రకాల ఒలింపియాడ్స్‌ను నిర్వహిస్తోంది శ్రీచైతన్య. మ్యాథమేటిక్‌ అసెస్‌మెంట్‌ టెస్ట్‌ (MAT), ఫిజిక్స్‌ అసెస్‌మెంట్‌ టెస్ట్‌ (PAT), కెమిస్ట్రీ అసెస్‌మెంట్‌ టెస్ట్‌ (ChAT) పేరుతో ఒలింపియాడ్స్‌ నిర్వహిస్తోంది. ప్రతీ పరీక్షకు రూ. 200 వసూలు చేస్తోంది. మూడు పరీక్షలకు గాను రూ. 600/`లతో దాదాపు 3 లక్షల మంది విద్యార్థుల దగ్గర నుండి రూ. 18 కోట్లు వసూలు చేస్తోంది. గత 10 ఏళ్ళుగా  కోట్లు వసూలు చేసింది శ్రీచైతన్య. ఫీజలు చాలదన్నట్టు ఒక లేని పోటీ ప్రపంచాన్ని సృష్టించి పిల్లలపై తల్లిదండ్రుల ప్రేమ, వారి భవిష్యత్తును ఆసరా చేసుకుని అడ్డు అదుపు లేకుండా దోచుకుంటోంది. ఒక్క మాటలో చెప్పాలంటే మొత్తం స్కూల్‌ వ్యవస్థను దోపిడీకి అడ్డాగా మార్చుకుంది. పరీక్షల్లో మంచి ఫలితాలు సాధించిన విద్యార్థులకు లాప్‌ట్యాప్‌లు, నగదు బహుమతులు, సర్టిఫికెట్స్‌ ప్రదానం చేస్తోంది శ్రీచైతన్య.

నారాయణ నిర్వహించే నకిలీ ఒలింపియాడ్స్‌ ఇవే...CNAPS

పులిని చూసి నక్క వాత పెట్టుకున్నట్లు శ్రీచైతన్యను గుడ్డిగా ఫాలో కావటమే నారాయణ టాలెంట్‌. శ్రీచైతన్య సొంతంగా ఒలింపియాడ్స్‌ నిర్వహిస్తూ డబ్బు సంపాదన గురించి తెలిసిన వెంటనే సినాప్స్‌ పేరుతో ఒక సంస్థను ప్రారంభించింది నారాయణ. CNAPS ( కౌన్సిల్‌ ఫర్‌ నర్చురింగ్‌ అకడమిక్‌ పొటెన్షియల్‌ ఇన్‌ స్టూడెంట్స్‌ ) పేరుతో ఫేక్‌ ఒలంపియాడ్స్‌కు తెరతీసింది. ఇంటర్నేషనల్‌ స్టాండర్డ్‌ మ్యాధమ్యాటిక్స్‌ ఒలింపియాడ్‌ (IAMO), ఇంటర్నేషనల్‌ స్టాండర్డ్‌ సైన్స్‌ ఒలింపియాడ్‌ (ISSO), ఇంటర్నేషనల్‌ స్టాండర్డ్‌ నాలెడ్జ్‌ ఒలింపియాడ్‌ (ISKO), ఇంటర్నేషనల్‌ స్టాండర్డ్‌  ఇంగ్లీష్‌ ఒలింపియాడ్‌ (ISEO), ఇంటర్నేషనల్‌ స్టాండర్డ్‌ సైబర్‌ ఒలింపియాడ్‌ (ISCO) ఇలా 5 రకాల ఒలింపియాడ్స్‌ నిర్వహిస్తోంది. ఒక్కో ఎగ్జామ్‌కు రూ. 150 /- చొప్పున దాదాపు  4 లక్షల మంది విద్యార్థులతో  విద్యార్థుల ఆర్థిక స్తోమతను బట్టి కనీసం 3 రకాల ఎగ్జామ్స్‌  గరిష్టంగా  5 రకాల ఎగ్జామ్స్‌ కోసం ఒక్కొక్కరి దగ్గర నుండి రూ. 450/- దగ్గర నుండి  రూ. 750/- వసూలు చేసింది.  ఒక్క  2022 సంవత్సరంలోనే దాదాపు  రూ. 10 కోట్లు  విద్యార్థుల దగ్గర నుండి పిండుకుంది. నారాయణ. గత 3 సంవత్సరాలుగా  6, 45, 890 మంది విద్యార్థులతో మొత్తం 17,12, 676 ఎగ్జామ్స్‌ను నిర్వహించింది. అంటే 25 కోట్ల రూపాయలు పైనే కొల్లగొట్టింది. ఈ దోపిడీ చాలదన్నట్టు నారాయణ స్కూల్స్‌ ఈ విద్యాసంవత్సరం నుండి  నేషనల్‌ టాలెంట్‌ ఎగ్జామ్‌ (NTEX), రీజనల్‌ ఒలింపియాడ్‌ ఇన్‌ మ్యాథమ్యాటిక్స్‌ (ROM), జూనియర్‌ ఒలింపియాడ్‌ ఇన్‌ సైన్స్‌ Ê ఆస్ట్రానమీ  ( JOSA)  వంటి మరో 3 రకాల ఒలింపియాడ్స్‌ను  అదనంగా  అందుబాటులోకి  తెచ్చింది. పాత ఒలింపియాడ్స్‌ కి రూ. 250 /- చొప్పున,  కొత్త ఒలింపియాడ్స్‌కి రూ. 300/- చొప్పున ఎగ్జామ్‌ ఫీజుగా నిర్ణయించింది. ఈ ఎగ్జామ్స్‌ అనంతరం కనీసం ఒక్క బహుమతి కూడా విద్యార్థులకు అందించకుండా మొత్తానికి మొత్తం తన అకౌంట్‌లోనే వేసుకుంటోంది నారాయణ.